IzdvojenoKultura

U GRADSKOJ GALERIJI “JOSIP BEPO BENKOVIĆ”- SVJETLOSTI I SJEĆANJA NA SLIKAMA MIKIJA RADULOVIĆA

U gradskoj galeriji Josip Bepo Benković otvorena je sinoć izložba slika Milovana Mikija Radulovića koji je za novi susret sa hercegnovskom likovnom publikom odabrao 60 radova različitih formata, rađenih tehnikom ulja na platnu.

 Na slikama su prepoznatljivi motivi na koje je ukazao i Minja Bojanić, novinar i publicista koji je izložbu otvorio ističući zbog čega se divi Radulovićevim djelima na kojima “makar i za zeru” kako je rekao svjetlo uvijek nadjača mrak:

Tu, gdje plemenite koze izdašno zrače zdravinom, uz ove kućerke koji nas iščekuju istrajno, poput predaka posustalih pogleda u ramu sićušnog prozora, nad kojima bdiju tek moćni gorostasi od stogova sijena. Gotovo svako izdanje ispod tvoje olovke meni je radosno podsjećanje na prohujalo nam djetinjstvo, snažan i opominjući prilog zaboravljenoj slikovnici za odrasle, ali i sjetna, pastoralna – pjesma nad pjesmama,  kazao je između ostalog Bojanić.

U moje slike utkane  su one  iz ko zna kojeg momenta i kojeg mjesta, a ta širina, vazduh, svjetlost to sjećanje  je vjerovatno traženje slobode, objašnjava Miki Radulović. Evo i objašnjenja za bjeline koje su uvijek prisutne na njegovim platnima.

-Ono što je ostalo u meni, to slikam, a ne ono što trenutno vidim. Kada bih slikao ono što vidim, to bi bilo prepisivanje. Ovo su neka moja sjećanja kojih sam ja nesvjestan. Tek kada ih naslikam probudi mi se nostalgija. Mene u stvari samo interesuje atmosfera, ona koja dira. Bjeline na mojim slikama su nešto skriveno, da li od sunca, mjeseca ili nečeg drugog, svejedno, ali t o je ta misterija, tajanstvenost  u svemu tome što radim.

Radulović je član  ULUCGe, a do sada je imao više od 40 samostalnih izložbi i učestvovao na preko 200 kolektivnih izlaganja.  Izložbu koja je otvorena u oba galerijska prostora možete pogledati narednih desetak dana.

Fotografije: Duško Vukić

 

Ostavite Vaš komentar

WP Facebook Auto Publish Powered By : XYZScripts.com