IzdvojenoNOVI PRIČA

“NOVSKA KULINARKA” -FRITAJA I ŠPAGETE SA ŠPAROGAMA

Stađun je od šparoga, volimo ih jesti, a najčešći način pripreme je pod ulje ili sa jajima i krompirom. Međutim, ima toliko mnogo načina da šparoge pripremimo. Recept za jedan doručak i jedan ručak otkriva nam gđa Mira Martinetti. 

-Od šparoga može zaista mnogo toga da se napravi, i za doručak, ručak, večeru, da guštate cijeli dan. Nema ih još dugo, zato ih sada spremajte. Za doručak može da se spremi fritaja. Potreban vam je mladi luk, isjeckajte ga, zatim šparoge, ako berete sami onda odmjerite koliko materijala vam treba, ako kupujete na vezice onda dvije-tri. Zavisi koliko je ljudi na doručku.

Šparoge isječete dokle je mekano i stavite na vrelo maslinovo ulje u koje ste već stavili isjeckani luk, kratko pržite, samo da promijene boju, a zatim prelijte umućenim jajima.  Kada se isprži sa jedne strane, okrenite  s druge i imate divan doručak, a uz neku šniclu može i da bude ručak, za koji naša sagovornica ipak predlaže špagete sa šparogama.

-Uzmete nekoliko vezica šparoga, zavisi za koliko ljudi spremate.  Isjecite ih, tvrdi dio šparoga se ne baca, jer se od njih može napraviti čorba. Mekani dio šparoga obarite,  a zatim ih obarene stavite   u ugrijano ulje.

Dodajte sječeni bijeli luk,  malo promiješajte i dodajte čašu bijelog vina,  kada upije,  so i  biber i pustite da se malo kuva na tihoj vatri. Na kraju se doda pavlaka za kuvanje.  Mora se kuvati na tihoj vatri, da ne zagori. Sve namirnice koje se sad beru  spremaju  se jako brzo, jer se one ne smiju puno obrađivati.

Špagete kuvati posebno, procijedite, ali se ne moraju ispirati, samo dodajte sos od šparoga. Po želji, kada sipate u tanjir možete dodati parmezan –objasnila je Mira Martinetti.

Zbog svoje visoke nutritivne vrijednosti i siromašnog kalorijskog sastava, šparoge su idealne za pripremu laganih, zdravih jela tokom proljeća i ljeta dok traje sezona branja divljih zelenih šparoga. Jedna šoljica šparoga ima svega 43 kalorije pa je ta namirnica idealna ako želite redukovati prehranu i pripaziti na kilažu.

Danas postoji preko 300 vrsta šparoga, od kojih je samo 20 jestivih.

Prijatno!!!

Ostavite Vaš komentar

WP Facebook Auto Publish Powered By : XYZScripts.com