IzdvojenoNOVI PRIČA

„NOVSKA KULINARKA“ – ARTIĆOKE, BIŽ I BOB

Veoma cijenjen specijalitet u našim krajevima su punjene artićoke u saftu od biža i boba. Mnogi se ukusa tog jela sjećaju još od djetinjstva, neki ga možda tek sada otkrivaju, ali jedno je sigurno – nećete odoljeti a da ne probate!

„Novska kulinarka“ prelistala je kuvar pravog majstora, naše sugrađanke Mirjane Martinetti, a ona i ovog puta do najsitnijih detalja objašnjava.

-Vrijeme je od artićoka, one kratko traju i treba ih sada iskoristiti. Može se i od njih spremati mnogo toga, ali ih obično punimo. Pri kupovini obavezno obratite pažnju da ne budu prestare, ali ne smiju biti ni premale. Ako su prestare, nemate šta pojesti, a ako su premale, nemate šta napuniti i one se spremaju na drugi način. Dakle, potrebna je srednja veličina mlade artićoke. Stavićemo količinu koja je potrebna za 12 artićoka, jer se malo ko nakani da manje puni, ne isplati se jer ima posla. Na ovu količinu potrebno vam je dvije vezice ili osam mladih strukova česna (ne ide česan u glavice već mladi sa listovima), dvije vezice mladog luka, isto toliko petrusina, zatim mirođije ( dvije vezice ako se kupuje, ako se bere u bašti, onda jedna puna šaka). Takođe, potreban je papar, so, oko 250 gr prezle i maslinovo ulje. Treba kupiti biž i bob (ako ima boba „u maune“ još bolje, tada uzeti i toga i očišćenog). U veliku teću stavite biž, bob, ako ima maune, zatim vezicu mladog luka, isto toliko mladog česna, petrusina i mirođije, posolite, popaprite i ostavite sa strane. U drugu zdjelu stavite prezlu, isjeckajte preostali česan, mirođiju, petrusin, stavite soli i papra. Promješajte smjesu. Potom je potrebno oprati artićoke, odvojiti malo listove, ali polako jer lako pucaju, pa je dovoljno da ih samo malo izmaknete od središta. Otresite ih dobro i osušite, da ne budu mokre. Potrebno je pripremljenom smjesom, u kojoj je prezla, puniti svaki prostor iz lista, dok ne napunite svaki red, cijelu artićoku. Tako napunjenu, stavite je (uspravno) u teću u kojoj je smjesa od biža i boba. Ponavljate postupak dok ne postavite sve artićoke. Potom uzmete maslinovo ulje i laganim mlazom ga sipate po artićokama, nikako naglo, kako bi prezla upila ulje i zalijepila se za list i dobila masnoću. To je postupak koji malo duže traje, ali tako mora da se uradi. Sledeće što radite je da naspete vodu da artićoke ogreznu i stavite teću na ploču koju ste prethodno malo zagrijali. Kuvate na laganoj vatri, kod mene je to „na dvojku“, jer nemate mogućnost da promješate, a ako bude na jakoj vatri prezla će da ispadne iz artićoke i spadne na dno teće, a potom i zagori. Kuva se najmanje tri sata na laganoj vatri, a za to vrijeme biž i bob će se svakako skuvati, preostaje da provjerite da li su se skuvale i artićoke. To ćete znati ako lagano uspijete da izvučete listak artićoke i potom probate da li se „meso“ sa jedne strane lako skida zubima, jer to je inače način kako se artićoke jedu. Tada je gotovo, ne mora da se hladi, može odmah da se gušta! Ovo je inače specijalitet koji se napravi jednom ili dva puta u sezoni, valja tada iskoristiti!, kazala je Mira.

„Novska kulinarka“ nove recepte donosi od jeseni, i tada budite sa nama! Zahvaljujemo našoj sugrađanki Mirjani Martinetti na saradnji i brojnim receptima koje je podjelila sa našim slušaocima i čitaocima. Prijatno!

Foto: Mirjana Martinetti

Ostavite Vaš komentar

WP Facebook Auto Publish Powered By : XYZScripts.com